سمسور

په ۱۴۳ میلیونه افغانۍ د واخان جغلي سړک د دوهم فاز تړون لاسلیک شو

• 9 ساعته دمخه (13/03/2025)
• شریف الله ولیزاد
• 2

د کلیو د بیارغونې او پراختیا وزارت وايي، د بدخشان ولایت په واخان ولسوالۍ کې له بروغیل څخه بیا تر بزهای ګنبد پورې د واخان جغلي سړک د دوهم فاز جوړولو تړون یې له یوه شرکت سره لاسلیک کړی دی. 

دغه وزارت په یوه خبرپاڼه کې ویلي، چې دغه تړون نن د دغه وزارت په انګړ کې په ۱۴۳ میلیونه افغانۍ د سرپرست وزیر ملا محمد یونس اخند او افغان صداقت شرکت مسئولینو ترمنځ لاسلیک شوی دی. 

په خبرپاڼه کې راغلي، چې د دغه تړون له مخې به دغه شرکت د دغه سړک دوهمه ۷۱ کیلو متره برخه په اته متره پراخوالي سره جغل اندازي کوي، چې ورسره به سلګونو کسانو ته د کار زمینه هم برابره شي. 

د دغه سړک د دوهم فاز تړون داسې مهال لاسلیک شوی، چې دا مهال د دغه سړک د لومړي فاز کارونه د چین تر صفرې نقطې پورې رسېدلي او د هوا په سړېدو سره به یې ساختماني کارونه هم بیرته پیل شي.