لومړی پاڼه زموږ هدف کتابتون د ماشومانو لپاره انځورونه سندرې مرکې په غږ کې
سمسوراوبپاڼه  
خپلواکه، ټولنیزه او فرهنګی خپرونه
 
 
نوی شعرونه
06.04.2017 د ښاغلي ذبيح الله احساس شعرونه 06.04.2017 د ښاغلي سید شاه سعود شعرونه 29.03.2017 د ښاغلي اسیر منگل شعرونه 28.03.2017 د ښاغلي سلیم بنگش شعرونه 27.03.2017 د ښاغلي ډاکتر اسرار شعرونه 18.01.2016 ښاغلي صديق کاوون توفاني شعرونه 08.12.2015 ښاغلي نقيب احمد اتل شعرونه
 
مور وطن په چیغو چیغو
لیکوال: پيرمحمد کاروان   نېټه: 10.09.2015   خپرونکئ:   سمسور  

 که د زړه غوږونه لرې ، نو وا به یې ورې . د مور وطن چیغې او فریادونه . که د ایمان سترګې دې ړندې نه وي نو وبه یې وینې ، دمور وطن پر تن زخمونه او پرهارونه . دا پرهرونه چې هر پردي دښمن ، کافر ، مسلم ، لرې او ګاونډي زمونږ پر وطن لګولي د هغو ذکر ځکه نه کوو چې څه ناڅه زمونږ د ټولو سر پرې خلاص دی . رابه شو دې ته چې په دې زخمونو او پرهارونو کې ددې وطن بچي هم خاورې او مالګې شیندي . ددې وطن قومونه چې بایده دي د مور وطن د غېږې د ښکلا غونچه شي سړی حیران شي چې دا ګلونه دا ځینې ولې په اغزیو بدلوي . د وطن د قومونو تر منځ کله زیاتې او کله کمې فاصلې راځي . دا فاصلې که یې علاج و نه شي په سختو او مرګونو رنځونو هم اوړېدای شي . د قومونو تر څنګ د هر قوم تر منځ خپلمنځي دښمنۍ او فاصلې هم ورو ورو خطرناک پړاو ته ور نږدې کیږي . اې ددې وطن زویه اولورې ، که دې د سر او زړه په غوږونو کې له وطن نه د پردیتوب مالوچ نه وي ایښي نو بیا خو ورته غوږ شه . ستا مور وطن داسې نارې درته وهي : 

اې زما زویه اې زما لورې د خپلې سینې شیدې به در و نه بښم که به زما فریادونه د زړه په غوږونو وا نه ورې . ګورئ زه ستاسو هغه پخوانۍ مور یم چې عمر مې زرګونو کلونو ته رسیږي . یو وخت مې د آریانا لوی ټیکری پر سر ؤ . هغه مهال په هماغه ټیکري کې ښه ښکارېدم . بیا ډېرې پېړۍ وروسته مې د خراسان شال پر سر کړ چې په عمرونو عمرونو په همدې شال کې ښکلې و ایسیدم . اوس دا څو پېړۍ کیږي چې د افغانستان رنګین تور ، سور او زرغون شال مې پر سر غوړولی دی . دومره ښایسته په کې ښکارم چې پردي مې د کتلو تاب هم نه لري . له بده مرغه به ووایم چې دا خپل حسن را پورې اور دی چې دا څو لسیزې د خپل ځان او خپلو بچو په وینو کې لامبم . دا نن سوي فریادونه ځکه وهم چې تاسې په یوه ترخه حقیقت پوهول غواړم . 
واورئ زما لوڼو زما زامنو زه تاسې هر یو پېژنم . تاسو دا څو لسیزې جنګونو ځپلي یاست.د زړونو زور مو اوبه شوی او په وړه خبره سره لمبه کیدای شئ . ګورئ د خدای روی ته وګورئ له صبر او حوصلې نه کار واخلئ . یو بل په مینه سره و زغمئ ، په خپلو کې مه سره پردي کیږئ . له مانه مه پردي کیږئ ، له مانه انکار هم مه کوئ ځکه زه ستاسو اصل یم . دا به ډېر حماقت او لیونتوب وي چې فرعه را ولاړه شي او له اصل نه انکاري شي . ما تاسو ته مخکې هم وویل چې پر ماباندې دا خدایي ښایست د نږدې او لرو دښمنانو نه دی پیرزو . د پردې تر شا اهریمني او شیطاني لاسونه لاس په کار دي چې زما ملکوتي او پرښته صفته ښکلا تارو مار کړي . تاسې ټول زما لوڼې او زامن یاست ، تاسې د یو بل دښمن نه یاست . تاسې ټول د یوه الله بنده ګان او د محمد صلی الله علیه وسلم امتیان یاست . نن سبا چې د تعصب کوم مرض په تاسو کې پیدا شوئ باور وکړئ چې زما له رګ رګ نه آرام تښتیدلی دی . دا ډېر وژونکی بدرنګ مرض دی . تاسو د محمد صلی الله علیه وسلم دا اواز اورېدلی کنه چې فرمایي : هر هغه څوک چې تعصب کوي زما له ډلې نه دی . د خدای روی ته وګورئ د پیغمبر له کړئ ځانونه مه وباسئ . هر هغه څوک چې تاسې د تعصب په نامه د قوم ، ژبې او یا نورو ډلو ټپلو په نومونه د یو بل نه خوا توري کوي او په زړونو کې مو کرکې کري هغوی زما او ستاسو د ښمنان دي . کیدای شي یا احمقان وي او یا هم د نورو غلامان او لاس پوڅي . 
ګورئ زما کړیدلو لوڼو او زامنو زه ستاسو مور یم زه افغانستان یم . که ستاسو له منځه زما هر زوی او یا لور د تعصب او یا له وطن نه د پرديتوب په مرض اخته وي ، هیله ده چې د ځان علاج وکړئ . الله ته د نیمو شپو ژړاوې او دعاوې وکړئ چې ستاسو له زړونو کرکې و باسي او پرځای یې مینه را زرغونه کړي . 
ماستاسو له پاره ډېرې پټې خزانې ساتلې دي . که تاسې له یو بل سره مینه وکړئ ، که تاسې د یو بل درناوی وکړئ دا خزانې به ټولې ستاسو په هوساینه او درناوي کې په کاریږي . دا خزانې پردیو او دښمنو ښامارانو ته مه پریږدئ . زه ستاسو مور یم ، وایي چې جنت د مور تر قدمونو لاندې دی . هیله ده چې د خپلې مور مینه مو په رګ رګ را زرغونه شي .خپلې زخمي او کړیدلې مور ته د مینې او درناوي په ترانو آرام او خوشحالي و بښئ . زه ستاسو د مینې ، یووالي او یو ملت کیدو خوږې ترانې ته غوږ غوږ یم په بسم الله یې زمزمه کړئ .
وطنه مور يې زمونږ
***
سترګې او زړه مو ته يې = د ژوند اوبه مو ته يې 
شکر نعمت يې زمونږ = چې شته يو، شته مو ته يې 
د مينې کور يې زمونږ 
وطنه مور يې زمونږ = = = 
ته مو نغمه د وحدت = دا زير و بم به دې شو
ته مو ګلاب ګلاب يې = پرخه شبنم به دې شو
الهامي چوپه چوپيا 
مستانه شور يې زمونږ = = = 
وطنه ستا د بدن = مونږه يو غړي غړي 
ستا په ژوندون کې مو شتون = بې له تا مړي مړي 
ته مو څادر د لمانځه 
د ډوډۍ شکور يې زمونږ = = = 
هيله د پلار مو ته يې = لوی اعتبار مو ته يې 
د ارمانونو سردار = دعا د يار مو ته يې 
د ماشومتوب کوټڼۍ 
د خور او ورور يې زمونږ = = = 
د ګلابونو موري = يه د غاټولو مورې 
خزان خو چيرې مه شې = زمونږ د ټولو مورې 
ستا د دردونو کاروان 
ټکور ټکور يې زمونږ = = =
 
بېرته شاته