سمسور

ښایي دا به لومړی ځل وي چې د خپلې کورنۍ د غړو پر مرګ د خواشینۍ په کچه او یو شان د سلیمان لایق په مړینې غمجن او خواشینی یم.سلیمان لایق هم لکه دا نور ملیونونه افغانان ، یو افغان دی خو د هغه ځانګړنه دا ده چې د خپل مظلوم قام ، د خپل اسیر قام ،د خپل بېوزلي قام او د خپل وطن د پښو یبلو ماشومانو ، مظلومو خویندو ـ میندو او تشو لاسو کارګرانو ، بزګرانو او زیارایستونکو د هیلو او غوښتنو نومیالی ترجمان شو.اورنی شعر یې  د ملت ددغو دردونو د بیان  لپاره وکاروه.شعر او داستان به هرڅوک ووایي خو یونیم پکې لکه خوشال او یا رحمان شي او زموږ د زماني دغه اتل او دغه سرلوړی لکه جګ غر ، انسان همدغه لایق هم همدغه یوازینی شو. ، سلیمان لایق ، زموږ خوارانو د زړونو ترجمان شو .لایق د بېوزلانو رهبر شو.

 .ارواښاد سلیمان لایق درې ځانګړنې لري چې په همدې درې برخو کې باید د ده افکار او آثار راوسپړل شي :

۱ـ تنکی ځلمی لایق 

ـ قران خوان غلام مجدد 

ـ زده کوونکی سلیمان

۲ـ ځوان سلیمان 

ـ کلیوال سلیمان

ـ کابلی سلیمان لایق

ـ فرهنګي سلیمان لایق( شاعر ، لیکوال ، ژورنالیست او د راډیو کابل کارکوونکی)

۳ ـ سیاسي سلیمان لایق 

ـ د ملي دموکراتیکو افکارو  ګټونکی

ـ د افغانستان  له مهمو سیاسی او فرهنګي څېرو لکه  لیکوال او ژورنالیست نورمحمد تره کي دغه راز  میر غلام محمد غبار ، طاهر بدخشی، ببرک کارمل ، بارق شفیعي، میر اکبر خیبر ،عبدالروف بېنوا، ګل پاجا الفت ، آدم خان ځاځي ، عبدالوهاب صافی ، عبدالحی حبیبي او داسې نورو اغېزمنو شخصیتونو سره آشنا سلیمان لایق 

ـ د خلق دموکراتیک جریان د تاسیس یو تن مشر سلیمان لایق

ـ د ثور انقلاب  او  ملي مصالحي د وخت سلیمان لایق 

ـ او بیا د اسلامي تنظیمونو د حاکمیت د وخت تر ننه ، سلیمان لایق .

ارواښاد سلیمان لایق په دغو ټولو برخو کې د ژورې مطالعې ،پلټنې او څېړنې وړتیا لري  او که خدای توفیق راکړ  په همدغو برخو کې به د یو څه لیکلو جرآت وکړم .

سلیمان لایق  په خپل ټول عمر کې یو هېواددوست او ملي سیاستپوه، مفکر او مبتکر شاعر او لیکوال  او د هېواد د مطبوعاتو او په ځانګړې توګه د خپل حاکمیت په وخت کې  د افغانستان د پخواني راډیو تلویزیون او افغانفلم ډېر زړه سوانده ، پوه ، دقیق او نه ستړي کېدونکی ملګری او مواظبت کوونکی  پاتې شو. د خلق دموکراتیک ګوند د حاکمیت له پیل څخه بیا ترپایه  په هیڅ فساد،رشوت او ناوړه استفادي نه دی متهم.خیرخواه، ملي ، دموکرات او  سپېڅلی افغان و . که سړی له حقه تېر نه شي او د افرادو ایډیولوژیک پیوندونه په پام کې و نه نیسي  نو د افغانستان د معاصرو   ادبیاتو په پیاوړتیا او په ځانګړې توګه پښتو کیسه لیکنې  او پښتو شعر کې  د یو شمېر نور نومیالیو لیکوالو او شاعرانو  ترڅنګ ، ښاغلو نورمحمد تره کي او سلیمان لایق د یادونې وړ ، هېښونکې او اغېزمنه ونډه ترسره کړې ده .

اروا یې ښاده او جنتونه یې ځای ، او په دې توګه ګران غرزي لایق  او د ارواښاد سلیمان لایق د درنې کورنۍ د نورو غړو ، دوستانو او د افغانستان د فرهنګي کړیو ټولو لارویانو ته د تلیاد سلیمان لایق د مړینې له امله د زړه له کومې د تسلیت او غمراازۍ عرض کوم .سلیمان لایق به د خپلو آثار په برکت  د تل لپاره ژوندی وي . 

په درنښت

له ډنمارک څخه د افغان غږ د راډیو تلویزیون چلوونکی :  یوسف هېواددوست