سمسور

د طالبانو له انکار وروسته، د علماوو فتوا

• 4 کاله دمخه (07/11/2020)
• سید عبدالله پاچا
• 1486

تازه د قطر په پلازمېنه دوحه کې د نړۍ ستر دیني عالم شیخ یوسف القرضاوي د اسلامي جمهوریت مذاکراتي پلاوي سره لیدنه کې په افغانستان کې جګړه ناروا یاده کړې او د اوربند غوښتنه یې کړې.

شیخ القرضاوي چې د نړۍ علماء ورته درناوی لري، په داسې حال کې د افغانستان د جګړې د نامشروعیت لپاره فتوا ورکړې چې طالبانو یوه اوونۍ وړاندې د افغانستان د جګړې په تړاو د دیني علماوو څرګندونې رد کړې وې.

طالبانو په ډير صراحت او سپین سترګۍ سره هغه دیني علماء ناپوه بللي و چې د افغانستان جګړه یې ناروا بللې وه.

طالبان یواځې د پاکستان د جي ایچ کیو د علماوو فتوا ته درناوی لري او د هغې له مخې جګړې ته دوام ورکوي.

شیخ القرضاوي په ډاګه ویلي چې د مسلمانانو ترمنځ جګړه هیڅ شرعي جواز نه لري او نباید طالبان جګړې ته پلمې ولټوي.

القرضاوي غوښتنه کړې چې هر څه ژر دې د مسلمانانو ترمنځ اوربند وشي او د سولې خبرو د بریا لپاره دې هڅې ګړندۍ شي.

خو طالبانو ته افغانان مسلمانان نه ښکاري اوحاضر نه دي چې اوربند وکړي او جګړې کې کموالی راولي او یا یې بس کړي.

طالبان د جګړې پر سر امتیازات او امکانات اخلي او د دې جګړې د مشروعیت لپاره له کرايي شویو علماوو چې اصلا علماء نه بلکې د پاکستان د استخباراتو استخدام شوي مامورین دي، فتوا اخلي.

د طالبانو ځینې مشران هم په دې پوه دي چې د مسلمانانو ترمنځ د جګړې لپاره هیڅ دیني مشروعیت نشته، خو د دې لپاره چې جګړه کې یې ګټې دي او یا مجبوریت دی، څه نه وایي.

له دې سره یو ځای کابل کې د حج اوقافو وزارت له دیني علماوو سره یو ځای یو خبري کنفرانس کې په ایاتونو او احادیثو سره وښوده چې د افغانستان جګړه کې هیڅ دیني اړخ نه لري او یواځې انسان او افغان وژنه ده.

دې دیني علماوو طالبانو چلنج کړل چې د جګړې د مشروعیت لپاره حتی یو ایات او حدیث هم نه شي وړاندې کولی.

خو داسې ښکاري چې طالبان له دې ټولو ایاتونو او احادیثو منکر دي او یواځې د هغو مفسرینو خبره اوري چې د طالبانو جګړه مشروع بولي.

نور خو د ټولې نړۍ علماوو په جلا جلا کنفرانسونو او غونډو کې په ډاګه ویلي چې دا جګړه هیڅ مشروعیت نه لري او باید پای ته ورسیږي.