سمسور

ډیری افغانان ۲۰۲۱ کال کې بیړنیو مرستو ته اړتیا لري

• 3 کاله دمخه (20/12/2020)
• محمد نسیم ستانکزی
• 1010

ملګري ملتونه وایي، راتلونکي ۲۰۲۱ کال کې به د هغو افغانانو شمېر زیات شي چې خوراکي توکو او نورو بشري مرستو ته اړتیا لري.

دا سازمان د افغانستان اوسنی نفوس شااوخوا ۴۰ ملیونه ښيي او وایي، دې ډله کې نږدې نیمایي بشري مرستو او لاسنیوي ته اړتیا لري.

د دغه سازمان دبشري مرستو همغږې کوونکې اداره (اوچا) وایي، افغانستان د نړۍ په کچه دوهم هېواد دی چې ډېر وګړي یې د خوړو د نه‌خوندیتوب له ګواښ سره مخامخ دي.

اوچا د ۲۰۲۱ کال په ارزونه کې ویلي، اوس‌مهال څه باندې ۱۶ ملیونه افغانان بشري مرستو ته اړتیا لري او دوی کې ۵ نیم ملیونه داسې دي چې د خوړو د نه‌خوندیتوب له بېړني حالت سره مخامخ دي.

له دغه ګواښ سره مخامخ ډېر کسان هغه شاوخوا څلور ملیونه کسان دي چې په کور دننه بې‌ځایه شوي او له ګڼو اقتصادي او ټولنیزو ستونزو سره لاس او ګرېوان دي.