سمسور

ولې د طالبانو په افغانانو زړونه نه یخ کیږي

• 3 کاله دمخه (27/12/2020)
• سید عبدالله پاچا
• 1477

د چهارشنبې په سهار د کابل ښار چهلستون سیمه کې د فیفا اجرایوي مشر یوسف رشید په یو برید کې ترور شو، یوسف رشید کوم اړخ سره تړلی نه و او نه یې کومه ګنا درلوده، یواځې دا چې ښه سړی و، مشهور و او زیات خلک پرې خفه شول.

له تیرې یوې میاشتې راهسې په کابل او ولایتونو کې د ژورنالیستانو، مدني فعالانو او پيژندل شویو کسانو ترور روان دی.

دا قتلونه د نامالوم په نوم مالوم وسله وال کوي چې په طالبانو پورې اړه لري، خو په دومره توپير چې مسوولیت یې نه مني.

طالبانو له دې کار څخه څو هدفونه دي؟

لومړی: طالبان چې د پاکستان ملیشې دي، هر هغه کس پر طالبانو باندې ترور کوي چې څو کسان ورپسې خفه کیږي او یا پاکستان فکر کوي چې دا څېره یې اوس او یا وروسته مخالف ګرځیږي.

دویم: طالبان د سولې پروسه کې د فشار لپاره داسې خلک په نښه کوي چې له حکومت وغوښتل شي چې هر څه ژر سوله وکړي او په دې پروسه کې د طالبانو ټول وړاندیزونه ومنل شي.

دریم: طالبان چې پخوا یې د دا ډول ترور مسوولیت اخیست، اوس یې ځکه نه اخلي چې له نړیوالو سره یې ژمنه کړې، خو طالبان له خپل عادت او خپل بادار څخه مجبور دي چې دا کار وکړي.

څلورم: افغانان تر بل هر وخت د تاوتریخوالي څخه اندیښنه لري او له همدې کبله دا ډول مرګونه طالبان کوي چې خلک په ژوند کې تنګ او راتلونکی نظام د طالبانو په خوښه او ډول باندې ومنی.

پنځم: طالبان چې اوربند نه کوي، پوهیږي چې نورې ترهګرې ډلې شته چې جګړې ته دوام ورکولی شي او بیا د دوی ځای کم حسابیږي.

شپږم: که طالبان وایي چې دا بریدونه دوی نه کوي، نو بیا ولې په دې اعتراف نه کوي چې د دوی تر څنګ نورې ترهګرې ډلې هم شته چې تاوتریخوالي کې لاس لري.

له دې ټولو سره داسې تحلیل کولی شو چې طالبان هر هغه لار کاروي چې په کابل باندې یو ځل بیا د اسلام اباد واکمني وچلوي.

طالبان دې ته لار برابروي چې د حکومت پرضد د خلکو شور جوړ شي، د حکومت حاکمیت او مسوولیت تر سوال لاندې راشي.

طالب دې په دې پوه شي، که پر افغانانو له دې هم سخته ورځ راشي، بیا طالبانیزم نه مني او نه افغانان غواړي چې شا ته ستانه شي.