سمسور

طالبان د خپلو بادارانو لپاره وحشي بریدونه کوي

• 3 کاله دمخه (03/02/2021)
• عارف سمیر
• 1073

ولسمشر محمد اشرف غني وايي، پر هر افغان برید د افغانستان په عزت برید دی او عاملین یې د خدای او ولس پر وړاندې مخ تورن دي.

نوموړي نن په کابل کې د جمعیت اصلاح د مرکزي شورا پر ریئس برید غندلی او ویلي یې دي، چې طالبان باید دا درک کړي، چې د ترهګرۍ له لارې، نه د خپلو بادارنو شومو موخو ته رسېدلی شي، نه د جنایتون له مسؤلیت څخه ځان خلاصوی شي او نه هم علما د ترهګرۍ ضد اسلامي او ملي دریځ څخه اړولی شي.

بل پلو د ملي امنیت شورا ویاند رحمت الله اندړ هم نن پر خپل ټویټر لیکلي و، چې طالبان په افغانستان کې د هر ډول ترهګرو کړنو لپاره د فعالیت زمینه برابره کړې، چې مسؤلیت یې بېرته همدې ډلې ته ورګرځي.

ولسمشر غني یادې څرګندونې داسې مهال کوي، چې تېره ورځ اروپايي ټولنې هم په افغانستان کې د هر ډول ترهګریزو او تخریبي کړنو عاملین طالبان وبلل.