د جګړو زیاتوالی؛ بریښنا شرکت وايي، چې دوه میاشتو کې مو یو میلیارد عواید د لاسه ورکړي
- 3 کاله دمخه (05/08/2021)
- سمسور نیوز
- 1169
بریښنا شرکت وايي، چې په دې وروستیو کې جګړو زور اخیستی او د شاوخوا ۱۰۴ زره پیریدونکو څخه یې پیسې نه دي راټولې کړي.
د بریښنا شرکت ویاند سنګر نیازی وايي، د ۱۴۰۰ مالي کال له پیله تر اوسه د هرات، بغلان، کندوز، فاریاب، تخار او سرپل ولایتونو نا امنو سیمو کې د بریښنا کارولو له اړخه یو میلیارد او ۱۲۶ میلیونه افغانۍ عواید نه دي راټول شوي.
د افغانستان بریښنا شرکت د معلوماتو له مخې د طالبانو تر کنټرول لاندې سیمو کې تېرو ۱۵ کلونو کې ۳۳۰ میلیونه عواید د لاسه ورکول؛ خو اوس د طالبانو لخوا د ولسوالیو د مرکزونو له نېول کېدو وروسته په تېرو دوه میاشتو کې په ۷ ولایتونو کې یې یو میلیارد نورې افغانۍ هم د لاسه ورکړي دي.
بریښنا شرکت په داسې مهال د عوایدو د لاسه ورکولو خبره کوي، چې په دې وروستیو کې په مختلفو سیمو کې د نا معلومو کسانو لخوا د بریښنا پايې وهل شوې وې.