سیاسي مشرانو سره د ولسمشر لیدنه؛ د ولسي پاڅونونو تجهیز دې چټک کړایشي
- 3 کاله دمخه (09/08/2021)
- سمسور نیوز
- 1009
ولسمشر غني نن له غرمې مخکې له سیاسي او جهادي مشرانو سره د لیدنو پر دوام؛ یو وار بیا یو شمېر سیاسي، جهادي او د ملي شورا له رئیسانو سره په ارګ کې د هېواد د وضعیت په هکله بحث او خبرې اترې کړې.
ولسمشرۍ ماڼۍ په یوه خپره کړې خبر پاڼه کې وایي، چې په دغې لیدنه کې، د جمهوریت د پایښت او دوام او د امنیتي او دفاعي ځواکونو د ملاتړ ترڅنګ، د طالبانو د یرغل په وړاندې د ولسي پاڅونونو د انسجام، پیاوړتیا او په چټکه توګه د تجهیز او سمبالتیا په هکله پرېکړه وکړه.
ولسمشر غني تر دې وړاندې نن د جمهوري ریاست پخواني مرستیال محمد یونس قانوني سره هم په ارګ کې د هېواد د روان امنیتي وضعیت پر سر کتلي دي.
ارک وایي، په دې کتنه کې د هېواد پر عمومي امنیتي وضعیت سربېره ښاغلي قانوني له نظام، افغان ځواکونو، د افغان ولس د مخالفینو پر وړاندې د واحد غږ او صف د پیاوړتیا او وروستیو دوو لسېزو لاسته راوړنو د ساتنې په اړه خپل هر اړخیز ملاتړ څرګند کړ.