فرانسې له کابله د خپلو اتباعو د اېستلو ماموریت پایته ورساوه
- 3 کاله دمخه (28/08/2021)
- سمسور نیوز
- 1317
فرانسې هېواد له پلازمېنې کابل څخه د خپلو ټولو اتباعو د اېستلو ماموریت پایته رسولی دی.
د فرانسې دفاع وزیره فلورنس پارلي وایي، دوی له کابل څخه د خپل خلکو اېستلو ماموريت، د شنبې ورځې په وروستي پرواز سره، پای ته رسولی دی.
نوموړې پر خپله ټوېټر پاڼه لیکلي، چې د فرانسې پوځ دا ماموريت د اګست په ۱۵مه پیل کړی و او په دې موده کې يې د ۲۶۰۰ افغانانو په ګډون، ۳۰۰۰ کسان اېستلي دي.
په همدې حال کې د برېتانیا پوځ هم ويلی، چې له کابله به د ایستلو پروسه د شنبې په ورځ پای ته ورسوي.
د برېتانيا دفاع وزیر بین والاس ویلي، دغه پروسه خپل د پای ساعتونو ته نژدې شوې او په هغې کې به یوازې هغه کسان چې د کابل هوايي ډګر ته داخل شوي وباسي.
د نوموړي په خبره، چې د تېرو دوو اونیو په جریان کې يې څه باندې ۱۴۵۰۰ خپل اتباع او افغان همکاران له کابله اېستلي دي.
باید یاده شي، چې له افغانستان د ټولو بهرنیو سرتېرو وتلو یوازې درې ورځې پاتې دي، چې باید له افغانستان ووځي.
په عین حال کې امریکا هم د خپلو اتباعو او افغان همکارانو د اېستلو پروسه چټکه کړې، چې د مالوماتو لهمخې تر دې دمه یې څه د پاڅه یو لک کسان له افغانستانه اېستلي دي.