ترکیې ته کډوالو احتمالي څپه؛ اردوغان: ترکیه د افغان کډوالو له یوې بلې څپې سره نهشي مخامخ کېدای
- 3 کاله دمخه (13/10/2021)
- خالد سهار
- 1064
د ترکیې ولسمشر رجب طیب اردوغان وایي، هېواد به یې ونه شي کولای، چې د افغان کډوالو له یوې بلې څپې سره مخامخ شي.
ښاغلي اردوغان د افغانستان په اړه د شلو صنعتي هېوادونو په غونډه کې ویلي، چې افغانستان کې وضعیت ته په کتو ښايي له افغانستان کډوالي ډېره شي، چې پر اروپايي هېوادونو به هم اغېزه ولري.
هغه د خبرو په دوام ټینګار کړی، چې د جي۲۰ ډله باید طالبانو ته د همهشموله حکومت لارښوونه وکړي او په وینا یې، چې په دې هېواد کې د ترهګرۍ خطر اوس هم په خپل حال دی.
ترکیه، چې اوسمهال په نړۍ کې تر ټولو د ډېر شمېر کډوالو کوربنه ده، پر خپلو پولو امنيتي تدبيرونه زيات کړي او خبرداری يې ورکړی، چې نور افغان کډوال او پناه غوښتوونکي نهشي منلی.
هاخوا بیا د ایران د کورنیو چارو وزیر احمد وحیدي له افغان کډوالو غوښتنه کړې، چې د ایران پولې ته دې نه ورځي او په خپل هېواد کې دې پاتې شي.
ښاغلي وحیدي همداشان ویلي، هغه افغانان چې د ایران له پولې واوړي بېرته به د امنیتي ځواکونو له خوا افغانستان ته ولېږدول شي.
وروسته تر هغه، چې طالبانو د افغانستان بشپړ کنټرول په لاس کې واخیست، ورسره سم ایران ته د افغان کډوالو په ورتګ کې زیاتوالی راغلی او یو شمېر افغانان هڅه کوي، چې د ایران له لارې ځانونه ترکیې او بیا اورپايي هېوادونو ته ورسوي.