یو شمېر اسلامي هېوادونه؛ له تالېبانو د افغان نجونو د زده کړو حقونه غواړي
- 3 کاله دمخه (14/10/2021)
- سمسور نیوز
- 1173
ټاکل شوې ده٬ چې د اسلامي هېوادونو یو شمېر بهرنیو چارو وزیران کابل ته راشي او په افغانستان کې د نجونو زدهکړو پر وړاندې په شتنه خنډونو وغږېږي.
دوی به پر دې وغږېږي، چې افغانې نجونې باید پرېښودل شي چې زده کړې وکړي او له زده کړو د نجونو ممانعت د اسلامي اصولو خلاف عمل دی.
د راپورونو له مخې، تراوسه یوازې د ترکیې بهرنیو چارو وزیر مولود چاوش اوغلو او د اندونیزیا د بهرنیو چارو وزیر ریینو مارسودي راتګ کابل ته تایید شوي دي.
د دې سفر د وخت په اړه د ترکیې د بهرنیو چارو وزیر پرون یوې خبرې غونډې ته وویل چې په څو ورځو کې به دا سفر وشي.
طالبانو شاوخوا یوه میاشت وړاندې تر شپږم ټولګي پورته د نجونو پر ښوونځي بندیز ولګاوه.
خو ځینې طالب مشران وايي٬ چې دوی به ټولو نجونو ته ښوونځي ته د تګ اجازه ورکړي.
د یادونې ده چې نن د اندونیزیا ولسمشر جوکو ویدودو وویل٬ چې نړیواله ټولنه دې په افغانستان کې د ثبات او ټولشموله حکومت د جوړولو لپاره هڅه وکړي.
ولسمشر ویدودو په تازه څرګندونو کې ویلي چې هېواد یې په افغانستان کې د دایمي ثبات غوښتونکی دی.
دده په وینا دوی او د نړۍ ټول هېوادونه غواړي چې نور افغانستان له دایمي سولې او ثبات برخمن شي.