سمسور

د پيسو نړيوال صندوق خبرداری؛ د افغانستان اقتصاد به ۳۰٪ کمزوری شي

• 3 کاله دمخه (20/10/2021)
• خالد سهار
• 1071

د پیسو نړیوال صندوق خبرداری ورکړ، چې سږ کال به د افغانستان اقتصاد تر ۳۰ سلنه پورې کمزوری شي. 

د پیسو نړیوال صندوق په یوه تازه ټوېټ راپور کې ویلي، چې د اقتصادي وضعیت خرابېدو له کبله به ګاونډیو هېوادونو، ترکیې او اروپا ته د افغانانو کډوالي ډېره شي.

دې سازمان زیاته کړې، چې واک ته د طالبانو له رسېدو وروسته پر مرستو د افغانستان ولاړ اقتصاد د راکړې ورکړې بېلانس او سخت مالي کړکېچ سره مخامخ دی. 

راپور کې همداراز راغلي، چې تمه کېږي په افغانستان کې ګډوډي به په سيمه او له دې هاخوا د پام وړ اقتصادي او امنيتي اغېزې ولري چې ورسره به د افغان کډوالو د ګړندي زياتوالي لامل شي. 

دا څرګندونې په داسې حال کې دي، چې اوس‌مهال ګڼ شمېر افغان کډوال پاکستان، ايران، تاجکستان او اروپايي هېوادونو کې مېشت دي. 

خو د پيسو نړيوال صندوق ويلي، افغانستان ته صادرات د ايران، پاکستان، ترکمنستان او ازبکستان لپاره د اقتصادي او ټولنيز اړخه مهم دي.