افغان صرافانو سر له ننه کاري اعتصاب پیل کړ
- 2 کاله دمخه (15/05/2022)
- سمسور
- 715
سمسور(۲۵غوایی۱۴۰۱) د صرافانو سرتاسري ټولنې د افغانستان بانک د نوې طرحې په غبرګون کې نن یکشنبه په ټول هیواد کې کاري اعتصاب پيل کړی دی.
د صرافانو ټولنې په یوې اعلامیې کې ویلي چې د افغانستان بانک په شرایطو د کاري جوازونو اخیستل د صرافانو له توان څخه پورته دي.
د افغانستان بانک د پولي خدماتو شرکتونو او صرافانو لپاره نهه شرایط وضعه کړي دي.
د یادو شرایطو څخه هم په لوی ښارونو کې کې د صرافۍ جواز اخیستونکی باید ۵۰ میلیون افغانۍ مالي منابع ولري.
د صرافانو ټولنه وايي، چې د رامنځته شوي ستونزې د هواري په هدف یې زیاتې هڅې کړي، خو وايي چې غږ یې نه اورېدل کیږي.
د صرافانو په پرېکړه لیک کې راغلي: "ټولو صرافانو پرېکړه وکړه چې خپل فعالیتونه د مشکلاتو تر حل پوري بند کړي."
دوی ویلي، چې رامنځته شوې ستونزه باید له صرافانو سره په مشوره هواره شي.
د افغانستان بانک تر دا مهاله د صرافانو د کاري اعتصاب په اړه څه نه دي ویلي.