سمسور

ننګرهار؛ د مدرسې د چت پرېوتو له امله ۱۳ کسانو ته مرګ ژوبله اوښتې

• 2 کاله دمخه (25/06/2022)
• سمیر احمد
• 605

سمسور (۴چنګاښ۱۴۰۱) ځایي روغتیایي چارواکي وایي، چې ننګرهار ولایت کې د یوې مدرسې د چت رالوېدو پېښه کې یو زده کوونکی وژلی شوی او ۱۲ نور ژوبل دي. 

سرچینې ویلي، چې پېښه د خوږیاڼو ولسوالۍ اړوند کږې بازار پاس غونډۍ کلي کې د احمد شاه په نوم یوې دیني مدرسه کې شوې ده. 

د سرچینې په وینا، د پېښې ټپیان د خوږیاڼو ولسوالي او ننګرهار ولایتي روغتون ته لېږدول شوي دي. 

تر اوسه د چت د پرېوتو لامل نه دی څرګند شوی؛ خو ډېر کله دا ډول پېښې د زیاتو ورښتونو او د ځینو ودانیو د زوړوالي له امله رامنځته کېږي. 

وړمه ورځ هم د ننګرهار په اچین ولسوالۍ کې د ورښت له کبله د یو کور د کوټې د چت پرېوتو پېښه کې یو تن مړ او ۵ نور ټپیان شوي وو.