متقي ازبکستان ته: له شوي تړون سره سمه برېښنا راکړئ
- 1 کال دمخه (22/01/2023)
- سمسور نیوز
- 579
سمسور نیوز (۲سلواغه۱۴۰۱) د بهرنیو چارو سرپرست وزیر، له ازبکستانه د شوي تړون پر اساس، افغانستان ته د برېښنا ورکړې غوښتنه کړې ده.
دا په داسې حال کې ده، چې په دې وروستیو کې د کابل په ګډون یو شمېر ولایتونه – چې وارداتي برېښنا ورکړل شوې– د برېښنا له ډېرو پرچاویو شکایت لري.
د افغانستان برېښنا شرکت د تېرې مرغومي میاشتې په ۱۱مه وویل چې له ازبکستان سره د وارداتي برېښنا تړون د یوه بل کال لپاره تمدید شوی دی.
خو مولوي امیرخان متقي نن په کابل کې د کرنیزو محصولاتو پراختیایي صندوق پرانېست غونډه کې ویلي، هیلهمن دی چې ازبکستان پر خپلې هغې ژمنه ودرېږي، چې د افغانستان له برېښنا شرکت سره یې کړې او افغانستان ته به د هوکړې له مخې، څه باندې ۴۰۰ مېګاواټه برېښنا ورکوي.
په ورته مهال، د بهرنیو چارو سرپرست وزیر په دې غونډه کې ویلي، افغانستان د ثبات پر لور روان دی او یو ښه راتلونکی لري؛ خو کلک عزم، اراده او محنت غواړي.
هغه زیاته کړې، د افغانستان په اړه د سیمې او نړۍ دهېوادونو نظرونه د بدلون په حال کې دي، په دې وروستیو کې ګڼو هېوادونو د افغانستان په اړه خپل مثبت نظرونه وړاندې کړي.