سمسور

په قرضونو کې غرق پاکستان؛ د مخالفو ډلو پر وړاندې عملیات پیلوي

• 1 کال دمخه (08/04/2023)
• سمسور نیوز
• 573

د پاکستان د ملي امنیت کمیټې تېره ورځ اعلان کړی چې په ټول هېواد کې د حکومت خلاف د جنګېدونکو ډلو پر وړاندې نوي عملیات پیلوي.

د ملي امنیت د کمېټې په اعلامیه کې راغلي، تېره ورځ د شهباز شریف په مشرۍ د پوځي او ملکي مشرانو په شتون کې یوه غونډه ترسره شوې چې په کې پاکستان کې د جنګېدونکو ډلو خلاف عملیات پلان شوي دي.

اعلامیه زیاتوي، په دې غونډه کې یوه کمېټه جوړه شوې چې د دوه اوونیو په ترڅ کې به د توند لارو ډلو پر وړاندې د عملیاتو وړاندیز وکړی.

د دې عملیاتو هدف له ترهګرۍ څخه د پاکستان خلاصول دي.

د دې عملیاتو اعلان په داسې حال کې کېږي چې اوس مهال پاکستان په بشپړ ډول له اقتصادي ستونزو سره مخ دی.

بل لورته د پاکستان د حکومت خلاف جنګېدونکو ډلو لاهم په دې اړه څه نه دي ویلي.