کابل او میدان وردګ کې سېلابونو ۴۱ کسان وژلي
- 1 کال دمخه (24/07/2023)
- سمسور نیوز
- 587
په کابل او میدان وردګ کې د وروستیو راوتلو سېلابونو له کبله ۴۱ کسان وژل شوي.
د کابل امینه قومندانۍ ویاند خالد ځدران پرخپله ټوېټرپاڼه لیکلي چې د پغمان په بر ارغندي، کوز ارغندي او بادام قول سیمه کې د سېلابونو له کبله د یوې مېرمنې او ماشوم په شمول اته تنه وژل شوي او اته نور ټپیان دي.
د ځدران د معلوماتو له مخې، د دغو سېلابونو په پایله کې دوه سوه څاروي وژل شوي او د استوګنې ۲۵۰ کورونه په پوره او یا نیمه ډول ویجاړ شوي دي.
په ورته مهال بیا د سرې میاشتې مسوولینو په میدان وردګ ولایت کې د سېلابونو له کبله د ۳۳ کسانو دوژل کېدو خبر ورکړی.
د سرې میاشتې ویاند عرفان الله شرفزوی پرخپله ټوېټرپاڼه لیکلي چې د سیلابونو له کبله په جلرېز ولسوالي کې ۳۱ او میدان ښار کې دوه تنه وژل شوي.
د معلوماتو له مخې، په دغه ولایت کې د سېلابونو له کبله ۲۳ نو ټپیان شوي او د استوګنې ۱۵۲ کورونه ویجاړ شوي دي.
د یادونې وړ ده چې لاهم د اوښتو تلفاتو شمېره کره نه ده.