لغمان کې ترافیکي پېښې دوولس کسانو ته مرګژوبله اړولې
- 1 کال دمخه (08/09/2023)
- سمسور نیوز
- 556
د کابل - جلال اباد پر لویه لاره د یو سورلۍ موټر د چپه کېدو له امله دوه تنه مړه او لس نور ژوبل شوي دي.
د لغمان امنیه قوماندانۍ ویاند یونس یوسفزي سمسور نیوز ته ویلي، چې دغه پېښه نن غرمه مهال د لغمان اړوند په «محمد علي کڅ» سیمه کې رامنځته شوې، چې له امله یې دوه تنه مړه او د یوې ښځې په ګډون لس نور ټپیان شوي دي.
نوموړي زیاته کړې، دغه ترافیکي پېښه د یوې بکسې د چپه کېدو له امله رامنځ ته شوې ده.
هغه ویلي، چې د پېښې ټپیان د لغمان ولایتي روغتون ته لېږدول شوي او روغتیايي وضعیت یې د ډاډ وړ دی.
د یادې ترافیکي پېښې لامل د موټر چلوونکي بې احتیاطي ښودل شوې.
په دې وروستیو کې د هېواد په ګڼو ولایتونو کې ترافیکي پیښې زیاتې شوې دي، چې تر ډېره یې لاملونه د موټر چلوونکو بې احتیاطي او تر حده چټک سرعت یاد شوي دي.