د ماهیپر تنګي سیمه کې د غره ښویېدنه لاهم روانه ده
- 1 کال دمخه (18/09/2023)
- 539
د ټولګټو چارو وزارت وايي، د کابل او جلال اباد ترمنځ لویه لاره په دویمه ورځ هم تړلې.
دغه لار پرون یکشنبه په ماهیپر کې د غره ښویېدو له امله تړل شوې ده.
د دغه وزارت ویاند اشرف حق شناس رسنیو ته ویلي، له غرونو لا هم ډبرې را ښویېږي.
د کابل- جلال اباد لار د ټرانزیټ او مسافرو لپاره مهمه بلل کېږي، چې هر ورځ پرې زرګونه مسافر او موټر تګ راتګ کوي.
د ټولګټو چارو وزارت له خلکو غوښتي، تر هغه، چې لار پرانېستل کېږي، د کاپیسا د تګاب او لته بند له لارو دې کار واخلي.
معلومه نه ده، چې دغه لار به کله بېرته پرانېستل شي؛ خو چارواکي وايي، د لارې د خلاصون لپاره یې هڅې روانې دي.
د یاد وزارت له لوري په خپره شوې خبر پاڼه کې راغلي، چې د بدیل سړک پر جوړولو لپاره کار روان دی، چې ژر به بشپړ شي.
خو خبر پاڼه زیاتوي، چې خلک دې د ځان خوندیتابه لپاره اوس پر دغه لار سفر نه کوي.