کابل کې د تېرې شپې چاودنې یوولس کسانو ته مرګ ژوبله اړولې
- 1 کال دمخه (27/10/2023)
- سمسور نیوز
- 529
د کابل ښار دشتي برچي سیمه کې یو ورزشي کلپ کې د تېرې شپې چاودنې یوولس کسانو ته مرګ ژوبله اړولې ده.
د کابل د امنیه قوماندانۍ ویاند خالد ځدراڼ ویلي، چې په دې چاودنه کې دوه تنه وژل شوي او نهه نور ټپیان دي.
هغه ویلي، چې چاودنه د «پل خشک» سیمې د پهلوانۍ په یوه ورزشي کلپ کې رامنځته شوې ده.
تر اوسه د چاودنې څرنګوالی معلوم نه دی؛ خو ځدراڼ وایي، چې د پېښې ځای ته یې د څېړنې ټیم رسېدلی دی.
بل لورته یو شمېر عیني شاهدان وایي، چې په دې چاودنه کې لږ تر لږه شپږ کسان وژل شوي او تر لسو زیات نور ټپیان دي.
د دغې چاودنې مسوولیت تر اوسه چا پر غاړه نه دی اخیستی.
د کابل د دشت برچي سیمه په تېرو دوو کلونو کې د مرګونو چاودنو شاهده وه.
په دې سیمه کې ډېری شیعه مذهبي اوسېږي.
دا ع ش ډلې له دې وړاندې په دې سیمو کې د مرګونو چاودنو مسوولیت پر غاړه اخیستی وو.