نړیوال جام کې تر پر له پسې ماتو وروسته؛ پاکستان نن له بنګلهدېش لوبه وګټله
- 1 کال دمخه (31/10/2023)
- سمسور نیوز
- 430
پاکستان په نړیوال جام کې له پر له پسې څلورو ماتو وروسته؛ نن بنګله دېش ته په ۷ وېکټو ماتې ورکړه.
پاکستان د بنګله دېشۍ لوبډلې د ۲۰۵ منډو هدف د درېیو لوبغاړو په سوځېدو په ۳۲ اورونو کې پوره کړ.
په دغې لوبه کې د پاکستان د پیل توپ وهونکو عبدالله شفیق او فخر زمان د تېر پرتله ډېره ښه لوبه وکړه او لوبډلې ته یې د بري بنسټ کېښود.
دوی په ترتیب سره ۶۸ او ۸۱ منډې وکړې.
د دې لوبې پچه یا ټاس بنګله دېش ګټلی و او خپله یې لومړۍ د توپ وهنې پرېکړه وکړه خو پیل یې د خپلې تمې خلاف ډېر کمزوری و.
پاکستان د لوبې په پیل کې هغه مهال چې په لومړیو لسو اورونو کې یې د ۳۷ منډو بدل کې درې مهم سیال لوبغاړي اوټ کړل ډېر برلاسی ښکارېده.
د بنګله دېش څلورم او پنځم لوبغاړي بیا څه اوږده ملګرتیا وکړه خو وروسته یې ټوله لوبډله په ۴۵ اورونو کې وسوځېده او پاکستان ته یې د ۲۰۵ منډو هدف کېښود.
دا په ښکاره کم هدف و چې پاکستان د دوه مهمو پواینټونو تر څنګ یې د پاکستان رن رېټ هم ښه کړ.
له دې بریا سره پاکستان د نومبرو په جدول کې له افغانستانه یوه درجه مخکې په پنځم مقام راغی او ورپسې افغانستان هم له درېو بریاوو سره په شپږم ځای دی.