ټرمپ: د بریا په صورت کې افغانستان ته ځم او د بګرام هډه بېرته نیسم
- 1 کال دمخه (20/11/2023)
- سمسور نیوز
- 562
د امریکا پخواني ولسمشر ډونالډ ټرمپ ویلي، چې که چېرې راتلونکې ټاکنې وګټي؛ نو افغانستان ته ځي او د بګرام پوځي اډې مدیریت بېرته اخلي.
نوموړي ویلي، چې دا کار به له اوسني سرپرست افغان حکومت سره د یوې معاملې په ترڅ کې وکړي.
ټرمپ، چې د امریکا د آیووای ایالت د فورت داج په یوه ټاکنیزه ناسته کې خبرې کولې، زیاته کړې، چې هغه به دا کار د چین د څارنې لپاره وکړي.
د بګرام پوځي اډه د بهرنیو ځواکونو تر وتلو وړاندې په افغانستان کې د امریکا ستره پوځي اډه وه.
امریکا د ۲۰۲۱ کال د جولای پر دوهیمه له افغانستان څخه له بشپړ وتلو مخکې د بګرام هوايي ډګر پوځي تاسیسات پرېښودل او د پخواني افغان حکومت ځواکونو ته یې وسپارل.
ټرمپ تر دې وړاندې هم په څرګندونو کې ویلي وو، چې که په واک کې وای، نو د بګرام پوځي اډه یې نه پرېښوده.
هغه په ولسمشر جوبایډن هم نیوکې کړې وې، چې ولې یې د بګرام په څېر یوه مهمه پوځي اډه پرېښوده چې له چین سره یوازې څو کیلو مټره واټن لري.