محکمې عمران خان او مېرمن یې پر ۱۴ - ۱۴ کاله بند محکوم کړل
- 9 مياشتي دمخه (31/01/2024)
- سمسور نیوز
- 408
د پاکستان یوې محکمې پخواني لومړي وزیر عمران خان او د هغه مېرمن بشرا بي بي ته د ۱۴ کاله بند سزا اورولې ده.
دواړه تورن وو، چې په خپلې واکمنۍ کې یې دولتي ډالۍ ساتلي او پلورلي دي.
د غویي په ۲۰مه عمران خان د اسلام اباد په یوې محکمه کې د امنیتي ځواکونو لهخوا نیول شوی و، چې لومړی اټک زندان کې و او له هغه وروسته اډیاله زندان ته ولېږدول شو.
تحريک انصاف ډلې د محکمې دغه پرېکړه يوه ټوکه او سياسي انتقام بللی دی.
د دې ډلې وياند ﺭووف حسن ویلي، چې د پاکستان د محکمو تاﺭيخ د ډېرو بدو پېښو او بدو پرېکړو شاهد پاتې شوی دی.
د دغې پرېکړې له مخې چې د پاکستان د احتساب محکمې کړې، بشرا بيبي او عمران خان ته د توشه خانې په مقدمه کې د ۱۴ کلونو بند سربېره ۱.۵ مېلیارده جرمانې د ټاکلو تر څنګ هغوی دواړه د ۱۰ کلونو لپاره نه شي کولی په دولتي څوکیو کار وکړي.