د امو دریا نفتي حوزه کې ۶ نوې څاه ګانې کيندل شوي
- 9 مياشتي دمخه (28/02/2024)
- سمسور نیوز
- 362
د کانونو او پټروليم وزارت وياند همايون افغان پر خپله اکس پاڼه ليکلي، د امو دریا نفتي حوزه کې يې ۶ نوې څاه ګانې کيندلې چې ورسره په دغه حوزه کې د نفتو د استخراج کچه په ورځني ډول ۱۳۵۰ ټنو ته لوړه شوې.
دغه حوزه چې د هېواد په شمال کې په فارياب، جوزجان او سرپل ولايتونو کې موقعيت لري ۲۴ څاه ګانې فعاله دي.
د ياد وزارت د وياند په خبره د استخراج کېدونکو نفتو د تصفيې چارې په هېواد دننه د خصوصي سکتور لخوا سرته رسيږي.
نوموړي همداراز ويلي، د روان ميلادي کال ترپايه به په ياده حوزه کې نورې څاه ګانې هم وکيندي.
د ده په خبره نوې څاه ګانې به ۱۲ دانې په قشقره، ۸ دانې په زمرد سای، يوه په بازار کمي او دوه په اق دریا کې وکيندل شي چې ورسره به د ټولو څاه ګانو شمېر ۴۷ ته ورسيږي او همداراز به د نفتو د استخراج کچه په ورځني ډول تر ۳۰۰۰ ټنو ورسيږي.
د ده په خبره اوسمهال په ياده حوزه کې ۱۵۰۰ تنه په مستقیم او غير مستقيم ډول په کار بوخت دي چې په راتلونکي کې به نورو کسانو ته د کار کولو زمينه هم برابره شي.