د سالنګ لاره خلاصه او په واورو کې اېسار کسان وژغورل شول
- 9 مياشتي دمخه (31/03/2024)
- سمسور نیوز
- 311
سیمه ییزو مسوولینو د ترافیکو پر مخ د سالنګ لویې لارې د بېرته پرانېستو خبر ورکړی دی.
د ټولګټو چارو وزارت ویاند وایي، دغه لاره تېره شپه د واورې د زیات اورښت او توپان له امله تړل شوې وه.
هغه پر خپله اېکس پاڼه لیکلي، چې لاره نن سهار درې بجې پرانېستل شوې او مسافر وړونکي موټر تګ راتګ کولای شي.
د سالنګونو د ساتنې ریاست یو مسول په ویډیويي کلیپ کې ویلي، چې په واوره کې یې له دوو سوو ډېر بند پاتې موټرونه ژغورلي دي.
د تولګټو چارو وزارت له مسافرو څخه غوښتنه کړې، چې پر یاده لاره د سفر پر مهال دې ترافیکو قوانین مراعت او ژمني توکي له ځان سره ولري.