سمسور

عمان کې د سرپرست حکومت ډیپلوماټانو فعالیت پېل کړی

• 2 مياشتي دمخه (17/09/2024)
• شریف الله وليزاد
• 134

 بهرنیو چارو وزارت خبر ورکړی، چې د عمان په پلازمينه مسقط کې د افغانستان د سفارت فعالیتونه د دوی د ډیپلوماټانو لخوا پیل شوي دي.

د دغه وزارت مرستیال ویاند حافظ ضیاء احمد تکل نن پر خپله ایکس پاڼه لېکلي، چې په دغه سفارت کې د دوی د ډيپلوماټانو فعالیتونه تېره اوونۍ بېرته په عادي ډول پیل شوي دي.

تکل په دغه بیان کې د یاد هیواد د بهرنیو چارو وزارت له همکارۍ څخه مننه کړې او دا کار یې د دواړو هېوادونو ترمنځ د سیاسي، اقتصادي او ټولنیزو اړیکو  په پراخوالي کې یو مهم ګام بللی دی.

که څه هم تر اوسه سرپرست حکومت په درېیو کلونو کې د اسلامي او ګاونډي هېوادونو په ګډون یوه هېواد هم په رسمیت نه دی پېژندلی؛ خو په ځينو هېوادونو کې د دوی ډيپلوماټان فعال دي او د هغو هېوادونو سفیران هم افغانستان کې فعالیت کوي.