سمسور

اروزګان کې ۱۲ کسانو ته مرګ ژوبله اوښتې

• 4 اونۍ دمخه (08/12/2024)
• شریف الله وليزاد
• 33

د اروزګان امنیتي چارواکو خبر ورکړی، چې د یاد ولایت په خاص اروزګان ولسوالۍ کې د یوې ترافیکي پېښې له امله درې کسان وژل شوي او نهه تنه نور ژوبل شوي دي. 

د یاد ولایت د امنیې قومندانۍ ویاند بلال اروزګاني سمسور نیوز ته ویلي، چې دا پېښه نن سهار شاوخوا اووه بجې له سړک څخه د یوه بار وړونکي موټر د اوښتلو له امله رامنځته شوې ده. 

د بلال په وینا، ژوبل شوي کسان د درملنې په موخه یوه روغتیايي مرکز ته لېږدول شوي او د هغوی روغتیايي حالت يې د ډاډ وړ یاد کړی دی. 

که څه هم اروزګاني د دې ترافیکي پېښې د رامنځته کېدو لامل نه دی په ډاګه کړی؛ خو د مسئولینو په وینا دا ډول پېښې زیاتره وختونه د ترافیکي قوانینو نه مراعتولو، خرابو سړکونو، تېز تګ راتګ او ځینو نورو عواملو له امله رامنځته کېږي. 

دا پداسې حال کې ده، چې تېره جمعه په غزني ولایت کې هم د دوو ترافیکي پېښو له امله یو کس ووژل شو او شپږ تنه نور ژوبل شول.