پر غزې د بریدونو دوام؛ اسرائیلو له سلو زیات اهداف په نښه کړي
- 1 مياشت دمخه (25/05/2025)
- سمسور نیوز
- 79
د اسرائیلو پوځ وايي، د شنبې په ورځ یې ( د غبرګولي ۳مه) د غزې په بېلابېلو برخو کې له سلو پر زیاتو اهدافو هوایي بریدونه کړي دي.
د اسرائیلو پوځ ادعا کړې، چې په دې بریدونو کې د حماس ودانۍ، تونلونه او زېربناوې په نښه شوې دي.
د غزې د روغتیا وزارت د معلوماتو له مخې، په دې بریدونو کې شاوخوا ۶۰ کسان وژل شوي دي.
په ورته وخت کې د غزې په جنوب کې د ناصر روغتون چارواکي وايي، پر دغه روغتون د اسرائیلو په برید کې د یوې ډاکټرې نهه ماشومان وژل شوي دي.
بل پلو د اسرائیلو پوځ وايي، په دې اړه څېړنې کوي.
له دې سره هممهاله، د الجزیرې خبري شبکې راپور ورکړی چې په المواصي سیمه کې د فلسطینیانو په ګڼه ګوڼې د اسرائیلي ځواکونو ډزو کې اووه کسان وژل شوي او ۵۰ نور ټپیان دي.
له بلې خوا، د اسرائیلي ځواکونو په ډزو کې د بشري مرستو د لېږدوونکو موټرو شپږ ساتونکي هم وژل شوي دي.
دا په داسې حال کې ده چې د اوربند ټینګولو او د بندیانو د خوشې کولو لپاره خبرې اترې له خنډ او ځنډ سره مخ شوې دي او اسرائیلو له قطر څخه خپل استازي بېرته ور غوښتي دي.