ښاغلي ذبيح الله احساس شعرونه
د احساس کورنی نوم بهرام دی خو له كوره بهر او په فرهنګي كړيو كې يې ټول په ذبيح الله پېژني.
له نن څخه اووه ويشت کاله وړاندې د بغلان ولايت په مشهوره سيمه کېله ګي کې د ډاکتر شېرمحمد كاكړ کره زوکړ.لومړنۍ اومنځنۍ زده کړې يې د جلاله اوجلوزو کمپونو په ښوونځيو کې بشپړې کړې. د فرهنګي اشنايانوپه ملتيا يې په جلوزو كمپ كې د ميوند ادبي ټولنه جوړه کړه اوهمدا يې د فرهنګي فعاليتونو پيل و.
پنځه کاله وړاندې احساس خپل کلي ته راستون شو، تازه مهال دبلخ پوهنتون د انجنيري پوهنځي څخه فارغ شو يانې اوس ((اينجينر ذبيح الله احساس)) دى .
په شمال کې داحساس پلونه نوې لارې جوړوي، مسلک اوهنر يې سره بېل دي خو دى پكې خوشاله دى. په مزارشريف ښار کې روضې ته څېرمه داحساس کوټه د جرګومرکو، ادبي بانډارونواوفرهنګي غونډو حجره ده. داحساس دخونې دړه دليکوالو، فرهنګيانو اوشاعرانو په مخ پرانستې وي.
داحساس هڅې خورې دي، په بغلان کې پسرلى درې مياشتنۍ خپروي چې اوسمهال د هېواد په كچه يوه بريالى سياسي او ټولينزه خپرونه بللى شو او ورسره يې د پلخمري مېشتو ځوانانو په ملتيا د چونغر ادبي بهير جوړ كړ. په مزارشريف کې د شمال د لومړى پښتو خپرونې ((پرخې)) چلوونكى دی، چې د ادبي او ټولنيزې ليكنې خپروي. دبلخ پوهنتون محصلينوپه ملتيا يې دوزيرمحمد ګل خان مومند بابا ادبي بهير روان کړی، ددرېيوو کتابونو(يوه نجلۍ- لنډې كيسې، زما له غرونو پناه ياره- ژباړه ناول او دوه ښارونه- د الفت صيب او جبران خليل ژباړل شوي نثرونه) ليکوال دی او دم ګړۍ له مزارشريف څخه د پژواک آژانس سره د خبريال په توګه کارکوي.
په لنډه موده كې به يې دوه نور كتابونه ( هغه – شعري ټولګه او حمزه د حمزه په ژبه- د حمزه بابا سره د خاطر غزنوي د مركې ژباړه) خپاره شي.
احساس لنډې کيسې ليکي، ژباړې اوڅېړنې کوي اوچې له نوروچارووزګار وي نوشاعرهم دی او هغه هم د ترنم شاعر.
احساس ته همدې سترو فرهنګي كارونو د ترسره كولو په وياړ په كابل كې د افغان كلتوري ټولنو جرګې لخوا د ستر خوشحال خان خټك په نوم د همدې جرګې په لومړۍ كاليزه كې د ۱۳۸۷ كال د غوره فرهنګيالي، د سرو زرو مډال وركړل شو.
زه د احساس، احساس او پراخه هڅې ستايم.