د ښاغلي د محمدصادق زهير شعرونه
محمد صادق زهير د ښاغلي محمد شريف زوى له نن څخه ١٩ کاله مخکې د ننګرهار ولايت د کامې ولسوالۍ د ککلو باجوړو په کلي کې دې نړۍ ته سترګې پرانستي دي، چې اوسمهال هم په نوموړي کلي کې خپلې شپې ورځې سبا کوي.
زده کړې يې له لومړي ټولګي څخه د شهيد محمد موسى شفيق په لېسه کې پيل کړي چې اوسمهال هم د نوموړې لېسې د ١٢ ټولګي زده کوونکى دى.
محمد صادق زهير په ١٣٨٥ کال کې شعر ته مخه کړه او تر اوسه يوه ټولګه شاعري لري چې زياتره يې غزلې دي.
هغه وايي چې د شعر تر څنګ يوه نيمه لنډه کيسه هم ليکي خو په وينا يې څومره مينه چې له شعر سره لري له نثر سره يې نه لري.
زهير د شعر ليکلو لامل له کوچينيوالي څخه له شعر سره خپله مينه ښيي.
زهير وايي چې په شاعرانو کې د رحمان بابا، خوشحال خان خټک، اميرحمزه شينواري، دروېش دراني، پيرمحمد کاروان، مصطفى سالک، فضل هادي فضليار، حيات الله ګهيځ شعرونه لولي او خوښوي يې.