له ورځې تښتم چې له شـوره ډکه ستا غوندې ده
شپې ته پناه وړمه شپـه چـوپه ده زما غوندې ده
په دغه دښتـه کې شايد دمينې قتل شوى
په دغه دښته کې اوس هم د زړه درزا غوندې ده
ستا د قربان قربان خبره مې اوس هم جانانه!
د زړه په لپـه کې راټوله د دعا غوندې ده
مينې يې داسې کړم چې ګورم اينه کې ځان ته
وايم چې دا څيره خو څه نه څه اشنا غوندې ده
زه پکې وينم د درد ځای ځای منظرې جلانه
ستا شاعري ټوله د واورې د رڼا غوندې ده