سمسور

بنګلادیش په خپل کور کې د اسټرالیا خلاف بریالی دی

• 3 کاله دمخه (05/08/2021)
• حضرت علي میاخېل
• 1128

د اسټرالیا او بنګلادیش کرکټ لوبډلو تر منځ د پنځه شل اوریزو لوبو دوهمه لوبه هم بنګلادیش لوبډلې وګټله.

یاده لوبه چې پرون د اګست په ۴ مه نېټه ترسره شوه لومړی توپ وهنه په کې د اسټرالیا لوبډلې وکړه او په ټاکلو شلو اورونو کې یې د ۷ لوبغاړو په سوځېدو ۱۲۱ منډې جوړې کړې او د ۱۲۲ منډو هدف یې بنګلادیشۍ لوبډلې ته کېښود.

د اسټرالیا لپاره په توپ وهنه کې موسیس هینریکس ۳۰ او میچل مارش ۴۵ تر نورو زیاتې منډې جوړې کړې.

د بنګلادیش لپاره بیا په توپ اچونه کې مستفیظ الرحمن درې لوبغاړي وسوځول.

بنګلادیشۍ لوبډلې ټاکل شوی هدف په ۱۸،۴ اورونو کې پوره کړ او په ۵ ویکټو او ۸ توپونو یې اسټرالیا لوبډلې ته ماتې ورکړه.

د بنګلادیش لپاره شکیب الحسن ۲۶ او افیف حسین ۳۷ تر نورو زیاتې منډې جوړې کړې.

ددغې لوبې د غوره لوبغاړي جایزه افیف حسین ته ورکول شوه، چې په ۳۱ توپونو یې په مهم وخت کې ۳۷ ناسوځېدلې منډې جوړې کړې. د افیف په دغو منډو کې ۵ څلوریزې او یوه شپږیزه شامله وه.

له دې وړاندې په لومړۍ شل اوریزه لوبه کې هم بنګلادیش د اسټرالیا کرکټ لوبډلې ته ماتې ورکړې وه.