سمسور

چینایي سوداګر: پلان لرو چې له افغانستان څخه انار صادر کړو

• 1 کال دمخه (27/11/2023)
• شریف ولي‌زاد
• 427

د چین هیواد د سوداګرو یو درې کسیزه پلاوی کندهار ته راغلی او دلته ئې د سوداګرۍ او پانګوني خوني له رئیس محمد صدیق مهمند سره په لیدنه کي ویلي چي، غواړي له کندهاره چین ته د انارو صادرات پیل کړي.

په دې لیدنه کي له چینایي پلاوي سره د سوداګریزو اړیکو د پراختیا او له سوېلي حوزي څخه چین ته د صادراتو په اړه هم خبري سوي دي.

دا مهال د کندهار انار پاکستان، هند او قراقستان هیوادونو ته صادرېږي.

د یادي خوني مرستیال عبدالباقي بنا وايي، کندهاري انار د ښه خوند او ښه کیفیت درلودلو له امله په نورو هیوادونو کي ډېر مینوال لري چي، اوس ئې چین هم د صادرولو هڅي پیل کړي دي.

بل خوا سوداګر وايي، د انارو د صادراتو له پاره ئې په سیمه کي لوی مارکېټ پاکستان دی؛ خو پاکستان زیات وخت په کندهار کي د تازه مېوو د حاصلاتو په وخت کي پر سپین بولدک دروازه ستونزي جوړوي او د صادراتو له پاره د بدیلي لاري غوښتنه کوي.