سمسور

فاریاب کې ۱۱ کسانو ته مرګ ژوبله اوښتې

• 1 مياشت دمخه (29/12/2024)
• شریف الله وليزاد
• 73

د فاریاب ولایت د امنیې قومندانۍ مسئولین وايي، پرون شپه د یاد ولایت په دولت آباد ولسوالۍ کې د یوې ترافیکي پېښې له امله یوه نجلۍ وژل شوې او د دوو مېرمنو په ګډون ۱۰ تنه نور ژوبل شوي دي. 

د یادې قومندانۍ ویاند سمسور نیوز ته ویلي، چې دا ترافیکي پېښه د یادې ولسوالۍ په شیخه سیمه کې د دوو مسافر وړونکو موټرانو د ټکر په نتېجه کې رامنځته شوې او ژوبل شوي کسان د درملنې مرکز ته لېږدول شوي دي. 

هغه د یادې ترافیکي پېښې د رامنځته کېدو لامل د موټر چلوونکو بې احتیاطي بللې او زیاتوي، چې له ډلې یې یو موټر چلوونکی نیول شوی دی. 

دا پېښه داسې مهال رامنځته شوې، چې، تېره جمعه د کابل- جلال آباد پر لویه لاره هم د یوې ترافیکي ‎پېښې له امله څلورو کسانو ته مرګ ژوبله واوښته.