2021-10-19
عشق سترگور کړمه لمرونه په مشال کې وینم
دریاب دریاب نور په واړه څاڅکي د خال کې وینم
د لمر سرکشه لمبه هم سپېرې ایرې شي اخر
زه هر کمال ته رسېدلی په زوال کې وینم
د سرور زیری به یې هم وژني بې تا چې شي څوک
آبداره توره د اختر د شپې هلال کې وینم
ړوند شه زاهد چې کاته ستا سترگو ته بولي گناه
زه دوه جهانه د ثواب په دې اوبال کې وینم
د اوبو تږی به سېراب په سرابونو نشي
څه که دې زه په هر مثال په هر تمثال کې وینم
ښکاري! ته ما وېشتای شې ذوق د پورته تللو مې نه
د الوت شوق مې په مات شوي پر و بال کې وینم
داسې وړیا ندی همدمه تبسم د حسن
دا هغه گل دی چې په خدای که یې په کال کې وینم
ستا د منگي خاوره په عطرو لندوي او ژاړي
گمان حرام دی مگر زه غلا په کلال کې وینم
یاره غزل وه د درمل که بتخانه د ازر؟
زر بُته ناز یې زه په هر یو سُر او تال کې وینم