د ډیوو په شرنګهار کې د رڼا په طرف درومم
د پاولیو په سینګار کې د هما په طرف درومم
را پخلا به کړم ښکلاوې د لیمو په ننواتې
زه د اوښکو په بازار کې د خندا په طرف درومم
زه د سوال خولګۍ ورلیږم د وږمو په لفافه کې
د سلګیو په مزمار کې د ښکلا په طرف درومم
خدایه چیرې به پیدا کړم زه د مښکو کاروانونه
د ګامونو په تلوار کې د دنیا په طرف درومم
بیا به بڼ ته کړم را ټولې مرورې مرغۍ ټولې
د زاریو په دربار کې د موسکا په طرف درومم
میلمانه به کړم ګلونه زه د سوو غنچو زړه ته
زه د هیلو په ګلزار کې د آشنا په طرف درومم
کابل ۲ غویی ۱۳۸۶ هجري لمریز ۲۲ اپریل ۲۰۰۷