ړنګې بنګې نشې ګوره چې د جام په لمن ښوري
څه خوږې وږمې د مښکو د ماښام په لمن ښوري
دا د کــــــــوم جادو کمال دی ځوانیمرګه پسرلیه
چې د عطـــــرو کاروانونه دې د بام په لمن ښوري
له غنچو، غنچو ګلونو دې منګولې د لاس ډکې
په زرګونو زړونه ښکلیه ستا د دام په لمن ښوري
د سیالۍ په ورا روان شول د نرګس ماما فوځونه
د خوښۍ څپـــــــــه یې مسته د امام په لمن ښوري
بیا شاهي پالنګ پوښلی د ګلاب په تصویرونو
الهامونه، میکیزونه عام او تام په لمن ښوري
څه رنګینې تماشې دي مچوي د ښکلا کرښې
ښایستونه شـــوه ارزانه د لیلام په لمن ښوري
کابل ۶ غویی ۱۳۸۶ هجري لمریز ۲۶ اپریل ۲۰۰۷ میلادي