څنګه کولی شو ژور خپګان (depression) وپېژنو او له اغېزمنو سره مرسته وکړو؟

څنګه کولی شو ژور خپګان (depression) وپېژنو او له اغېزمنو سره مرسته وکړو؟


  • 3 اونۍ دمخه (21/05/2021)
  • ثنا صافۍ
  • 117

یوه ورځ نیمه هر انسان کله کله له خپګان سره مخامخېږي خو که چېرې یو کس له دوو اوونیو ډېر خپه وي او یا خپګان د ژوند پر نورو برخو اغېز کوي نو دا ښايي د ژور خپګان نښه وي. ژور خپګان ورو ورو ډېرېږي او پرې اخته کسان په لومړنیو کې پرې خپله نه پوهېږي خو د کورنیو غړي یې په چلند کې بدلون ته معمولآ متوجه کېږي. 

د ژور خپګان نښې: 

له هغو کارونو سره مو مینه نوره نشته چې پخوا مو خوښېدل. د نهیلۍ احساس کوئ. یا ډېر نه خوځئ او یا ځمکه ځای نه درکوي. تل ستړي یئ او انرژي نلرئ. یا تر حد ډېر او یا هېڅ خوراک نکوئ. یا تر حد ډېر بیدېږئ او یا هېڅ خوب نه درځي. د وړو کارونو لکه د تلویزیون لیدو او لوستو پر وخت مو هم ذهن تمرکز نه کوي. 

څنګه په ژور خپګان له اخته کسانو سره مرسته وکړئ؟

هغوی پوه کړئ‌ چې تاسې یې په کیسه او غم کې یئ او هغوی درته مهم دي. ورته ووایئ چې تاسې غواړئ له زړه او بې قضاوت هغوی واورئ. هغوی چې څنګه دي تاسې یې منئ او خبرو ته یې غوږ نیسئ. په ارامه او مینه یې پوه کړئ چې له ځان سره مرسته وکړي لکه ورو فیزیکي تمرینات پیل کړي، پر وخت ویده شي، سمه او پر وخت ډوډۍ وخوري او هغه څه وکړي چې خوښېږي یې. هر ځای چې اوسېږئ له شته ادارو او خدماتو سره په تماس کې شئ. که په خپګان اخته کس له تاسې لرې وي نو د موبایل مسېج، پیغام او خبرو له لارې ورسره په تماس کې اوسئ. په خپګان له اخته کس سره حوصله وکړئ او زغم ولرئ. خپلې روغتیا ته هم پام وکړئ چې د ناروغ کس حالت پر تاسې تر اندازې ډېر فشار و نه کړي. 

کله له ډاکتر/رواني متخصص سره تماس ونیسئ؟ 

که فکر کوئ په خپګان اخته کس د ځان وژنې فکر کوي او یا ستاسې شک راشي چې په خپګان اخته کس ښايي ځانته تاوان ورسوي نو له ډاکتر سره تماس ونیسئ.