د دفاع وزارت چارسمبالی وزیر: د یو ملي او خپلواکه پوځ پر تشکیل مو کار پیل کړی
- 3 کاله دمخه (24/10/2021)
- خالد سهار
- 989
د طالبانو د حکومت د دفاع وزارت چارسمبالی وزیر مولوي محمد یعقوب مجاهد وایي، چې د یوه ملي او خپلواک پوځ پر جوړولو یې کار پیل کړی دی.
نوموړي بېګاه په یوه غزیز پیغام کې ویلي، دوی هڅه کوي چې د افغانستان ځمکنۍ بشپړتیا او هوایي حریم څخه ساتنه وکړي.
هغه په خپل پیغام کې ویلي، چې د ملي دفاع وزارت په چوکاټ کې به یو داسې خپلواک او ملي پوځ جوړ کړي چې په لوړ مورال سره د دې خاورې ساتنه وکړي.
د مجاهد په خبره، کوښښ کوي، څو د افغانستان اسلامي امارت پوځ په پرمختللو وسلو سمبال کړي، چې د ځمکنۍ وړتیا ترڅنګ به هوایي برخه کې هم لوړ مقام ولري.
ښاغلي مجاهد یو وار بیا د سیمې او نړۍ هېوادونو ته ډاډ ورکړ، چې د افغانستان له خاورې به چاته زیان پېښ نهشي.
د تېر حکومت تر راپرځېدو وروسته ګڼ نظامیان له یو ناروښانه برخلیک سره مخامخ شوي، چې یو شمېر اوسمهال په سختو کارونو پسې هم ملاتړلې ده.
که څه د دفاع سرپرست وزیر دا نهدي ویلي، چې آیا د پوځ په جوړښت کې د پخواني حکومت پوځیانو ته ونډه ورکوي او که نه؛ خو مخکې یې ځینو چارواکو ویلي، چې هغه پوځیان هم بېرته کارته غواړي.