برېتانیا خپلو وګړو ته افغانستان ته د سفر نه کولو خبرداری ورکړی
- 1 کال دمخه (10/05/2023)
- سمسور نیوز
- 508
د برېتانیا حکومت له خپلو اتباعو څخه غوښتي، چې د امنیتي کواښونو له کبله افغانستان ته له سفر کولو څخه ډډه وکړي.
د برېتانیا حکومت پرون په یوه اعلامیه کې د افغانستان امنیتي وضعیت ډېر ناوړه بللی دی.
په اعلامیه کې راغلي، چې په ټول افغانستان کې په ځانګړي ډول د هوايي ډګرونو په شااوخوا کې د ترورېستي بریدونو جدي خطر شته.
د بریتانیا حکومت وايي، د مذهبي مرکزونو په منځ او شااوخوا کې د روژې میاشتې په څېر د تروریستي بریدونو لوړ خطر شته.
بریتانیا خپلو وګړو ته ویلي، افغانستان ته سفر کول خورا خطرناک دی.
دغه حکومت په خپله اعلامیه کې ویلي، دا مهال په افغانستان کې د برېتانیا قونسلګري نهشته او نهشي کولای چې برتانوي وګړو ته لازم خدمات وړاندې کړي.
بل لورته سرپرست حکومت تر اوسه په دې اړه څه نه دي ویلي.