باجوړ کې پرونۍ چاودنه؛ د وژل شویو شمېر ۴۴ تنو ته ورسېد
- 1 کال دمخه (31/07/2023)
- سمسور نیوز
- 519
اسوشېټېدپرېس خبر ورکړی، د پاکستان په باجوړ کې د تېرې ورځې په چاودنه کې د وژل شویو شمېر ۴۴ تنو ته رسېدلی او نږدې ۲۰۰ نور ټپیان دي.
دا چاودنه د مولانا فضل الرحمان په مشرۍ د جمعیت علمای اسلام ګوند په یوه غونډه کې شوې ده.
د خیبر پښتونخوا پولیسو ویلي، د دوی پلټنو ښودلې، چې دا یو ځانمرګی برید دی، خو په دې اړه خپلو پلټنو ته دوام ورکوي.
تراوسه د دغې چاودنې مسوولیت چا یا کومې ډلې نه دی منلی.
خو د پولیسو په خبره، ښایي د دغه برید تر شا د داعش وسله والو لاس وي.
بل لورته تحریک طالبان پاکستان په دغه برید کې خپل لاس لرل رد کړي دي.