سمسور

حمید حسن: مورال مو لوړ دی؛ پاکستان څخه د لوبې ګټلو تمه شته

• 1 کال دمخه (21/10/2023)
• سمسور نیوز
• 759

د کرکټ د ملي لوبډلې د توپ اچوونې روزونکي حمید حسن په خپله تازه مرکه کې هیله ښودلې چې له پاکستان څخه به راتلونکې لوبه وګټي.
نوموړي ویلی، اوس مهال افغان لوبډله قوي شوې او اوس په مثبت فکر سره مخکې روانه ده.
هغه زیاته کړې، افغان لوبډله په داسې سټیج کې ده چې په راتلونکو لوبو کې به درې څلور نورو ټیمونو ته ماتې ورکړي.
حمید حسن ویلي، دی او ټول کوچ سټاف د لوبغاړو مورال لوړونې لپاره تل زیار ګالی او یوازې یې فکر پر لوبو ورټول دی.
هغه د نیوزیلنډ پر وړاندې د لوبې بایللو علت د کیچونو میس کېدل یاد کړل او تمه یې وښوده چې په راتلونکې کې به داسې کړنه تکرار نه شي.
ټاکل شوې چې افغان لوبډله خپله راتلونکې لوبه د هند په چینای لوبغالي کې له پاکستان سره ترسره کړي.
د کرکټ یو شمېر نړیوال مبصرین وايي، د چینای لوبغالی د سوکه توپ اچونې لپاره جوړ دی او ښايي پاکستان ته به دا سیالۍ سخته وي.
د یادونې وړ ده چې افغان لوبډلې تر دې وړاندې څلور لوبې کړې، چې یوه یې ګټلې؛ خو پاکستان بیا په څلورو سیالیو کې دوه ګټلې دي.