سمسور

د ماشوماتو د ساتنې ادارې ۱۸ روغتیایي مرکزونه تړلي

• 1 مياشت دمخه (12/03/2025)
• شریف الله ولیزاد
• 51

د ماشومانو د ساتنې نړیواله اداره مؤسسه (Save the children) وايي، په افغانستان کې یې ۱۸ هغه روغتیايي مرکزونه تړلي، چې دوی یې مالي ملاتړ کاوه. 

د یاد‎ې ادارې د افغانستان څانګې تېره ورځ په یوه راپور کې ویلي، چې دغه مرکزونه یې د مرستو د بندېدو او اقتصادي ستونزو له امله تړلي دي.

په راپور کې راغلي، چې دا مهال په افغانستان کې د دوی اړوند ۱۴ نور روغتيايي مرکزونه فعال دي، چې د یوې میاشتې لپاره مالې سرچینې لري او که مرستې ورسره و نه شي؛ نو هغوی به هم وتړي. 

په راپور کي زیاته شوې، چې دوی د روان ۲۰۲۵ زېږدیز کال په جنوري میاشت کې د دغو ټولو ۳۲ روغتیايي مرکزونو له لارې ۱۳۴ زره کسانو ته روغتیايي خدمات وړاندي کړي دي. 

دا خبر داسې مهال ورکول کېږي، چې تر دې وړاندې د امریکا نړیوالې پراختیايي ادارې (U.N.D.P) په تړل کېدو سره هم په افغانستان کې د یو شمېر بنسټونو فعالیتونه ټکني او ځنډني شول.