سرپرست حکومت د ايران پر اټومي تاسيساتو د امریکا بريدونه غندلي
- 3 ورځي دمخه (23/06/2025)
- سمسور نیوز
- 110
سرپرست حکومت پر ايران د امریکا وروستي بريدونه غندلي او ویلي یې دي چې دا ډول بريدونه د ستونزو په حل کې هېڅ مرسته نه کوي.
د سرپرست حکومت د وياند مرستيال، حمدالله فطرت دغه بريدونه د ايران د ملي حاکميت او ځمکنۍ بشپړتيا ښکاره نقض بللی دی.
فطرت ټينګار کړی چې دا ډول بريدونه په سيمه کې د بېثباتۍ او جګړو د پراخېدو سبب ګرځي.
له بلې خوا، پخواني ولسمشر حامد کرزي د امريکا د بريدونو په اړه اندېښنه څرګنده کړې او ټينګار کړی چې ټول هېوادونه، په ځانګړي ډول د ملګرو ملتونو د امنيت شورا دايمي غړي، بايد د دې سازمان له منشور، د اټومي وسلو د نه خپراوي تړون او نړيوال قانون سره خپله ژمنتيا وساتي.
د يادونې وړ ده چې امريکا د يکشنبې په سهار د ايران نطنز، فردو او اصفهان پر اټومي تاسیساتو هوايي بريدونه وکړل.
روسيې، پاکستان، شمالي کوريا او يو شمېر نورو هېوادونو هم دغه بريدونه غندلي دي.
د چين د بهرنيو چارو وزارت هم د امريکا او اسرائيلو له خوا پر ايران د بريدونو په اړه اندېښنه ښودلې او د اوربند د ټينګښت او د ښکېلو خواوو ترمنځ یې د خبرو اترو د پيل غوښتنه کړې ده.
بلخوا ايران بیا ويلي چې د ملګرو ملتونو د منشور له مخې، د خپلو ګټو، ولس او حاکميت د دفاع لپاره ټولې ممکنې لارې خوندي کوي.