سمسور

ولسمشر غني پاکستان ته: ستاسو راتلونکی له موږ پورې تړلی.

• 3 کاله دمخه (22/04/2021)
• نګینه ارشاد
• 1259

سمسور (پنجشنبه د غوایي ۲) ولسمشر غني کندهار ته د خپل سفر پر مهال د یاد ولایت مشرانو، متنفذینو او د بېلابېلو اقشارو استازو سره په جوړه شوې غونډه کې ګډون او وینا وکړه.

هغه وویل، کندهار په نظام او جمهوریت درېدلی او د جمهوریت غېږ، حوصله او لمن ډېره پراخه ده.

ولسمشر غني پاکستان ته په خطاب کې وویل، د ګټلو او که د بایللو سیاست انتخابوئ. 

ولسمشر غني زیاته کړه، ستاسو راتلونکی له موږ پورې تړلی، که د دوستۍ لاس راکړئ، نو ټوله منځنۍ اسیا مو چمتو کړې او د اباد افغانستان له لارې ستاسو لاسرسی ورته اسانه دی، خو که مو د بایللو سیاست چې د جګړې دوام دی غوره کړ، نو چې افغانستان اباد نه وي، منځنۍ اسیا ته به څنګه ورسېږئ؟

ولسمشر یو وار بیا پر سوله ییز حل ټینګار او پر طالبانو غږ وکړ چې د سولې لاره اختیار او د هیواد په ابادۍ کې چې تر ټولو اوچت دی برخه واخلي. 

باید یاده شي، چې ولسمشر غني کندهار ته په خپل سفر کې د مهمند نړيوال دوه سوه بستريز روغتون پرانيسته هم وکړه.