په دوحه کې د هند سفیر له طالبانو سره لیدلي
- 3 کاله دمخه (31/08/2021)
- سمسور نیوز
- 1299
په قطر کې د هند سفیر، د طالبانو د سیاسي دفتر له مشر عباس ستانکزي سره کتلي او په یو شمېر مسائلو یې ورسره خبرې کړې دي.
رويټرز خبري آژانس د هند د بهرنیو چارو وزارت په حواله ليکي، چې د دوی استازي، ديپک ميټال، په دوحه کې د طالبانو د سیاسي دفتر له مشر، شیر محمد عباس ستانکزي سره کتلي او په افغانستان کې یې د هندي اتباعو د ژوند پر خوندیتوب خبرې اترې کړې دي.
د دې وزارت د مالوماتو لهمخې، چې دا د طالبانو له خوا د کابل تر نیولو وروسته د هند او طالبانو ترمنځ لومړنۍ رسمي کتنه ده، چې د طالبانو د غوښتنې پر اساس ترسره شوې ده.
د هند بهرنيو چارو وزارت ويلي، په دې لیدنه کې دواړو لوریو په افغانستان کې د پاتې هندي اتباعو د خونديتوب په اړه خبرې کړې، چې طالبانو یې د امنیت تامین ډاډ ورکړی دی.
هند له اوږدې مودې راهیسې له طالبانو څخه په دې موخه اندېښمن دی، چې دغه ډله د هند له رقیب هېواد پاکستان سره نږدې اړيکې لري.
په داسې حال کې، چې طالب چارواکو ویلي، دوی له نړیوالو سره د ډیپلوماټیکو اړیکو غوښتونکي دي او ډاډ ورکوي، چې د بهرنیو اتباعو ژوند او امنیت ته به ځانګړې پاملرنه کوي.