د پکتیا د قومي مشرانو پرېکړه: پلرونه دې د لوڼو پر سر ډېر ولور نه اخلي
- 1 کال دمخه (05/07/2023)
- صحمد
- 649
د پکتیا احمد ابا ولسوالي قومي مشرانو یوې غونډې په ترڅ کې پرېکړه کړې چې تر دې وروسته څوک نه شي کولای په خپلې لور یا خور لوړ ولور واخلي.
د احمدابا ولسوالۍ د قومي مخورو په ۲۸ مادهییز تړون کې راغلي، تر دې وروسته به د نجلۍ ولور له څلور سوه زره افغانیو څخه پورته نه اخیستل کېږي او دغه راز د زوم پر کورنۍ د بې ځایه لګښتونو بار هم نه ور اچول کېږي.
قومي مشر او د پرېکړې ګډونوال حاجي خواني جهاني وايي، له دې وړاندې یې په سیمه کې د ځینو نورو ناوړه دودونو ترڅنګ د نجلۍ په سر ۷ سوه زره یا هم ۸سوه زره افغانۍ اخیستل کېدې، چې د نوموړي په وینا د زوم د کورنۍ لپاره یې پوره کېدل اسانه کار نه و.
هغه زیاتوي، چې اوس دوی په ګډه تړون کړی، چې ولور به له ۴سوه زره افغانیو پورته نه اخلي.
« موږ دا پرېکړه د خلکو د اقتصادي وضعیت او په سیمه کې شته شرایطو ته پام کړې او د خلکو اقتصادي وضعیت مو په نظر کې نیولی دی. ددې تړون په عملي کېدو سره به له یوې خوا ځوانان په خطرناکو قاچاقي لارو له سفر کولو راوګرځي، بل دا چې هغوی به له ناسمو کړنو لاس واخلي. دغه تړون کې مو د مړي پر سر د سقاط ورکول له منځه وړلو باندې هم ټینګار کړی دی.»
په ورته مهال د سیمې اوسېدونکي د قومي مخورو له دې پرېکړې هرکلی کوي خو ددې تړون پر عملي کولو ټینګار لري.
دوی وايي، دا ډول پریکړې نه یوازې د اقتصادي ستونزو مخنیوي لپاره ښه ګام بلل کیږي، بلکې ځوانان به نور دې ته مجبور نه شي، چې په مرګونو لارو د ولور او نور بې ځایه مصارفو د پوره کولو لپاره بهرنیو هیوادونو ته لاړ شي.
د پکتیا یو اوسېدونکی احمدشاه وايي: « پخوا هم ورته تړونونه شوي وو خو عملي نه شول. دا ځل زموږ هیله ده چې دا تړون عملي شي. که داسې ونه شي ځوانان به مو په قاچاقي لارو اروپايي هېوادونو ته د تګ تابیا وکړي او یا به د عربو په ګرمۍ کې سختې مزدورۍ کوي»
د پکتیا یو بل اوسېدونکی محمد شریف په لرو پرتو سیمو کې د ولور له زیاتوالي سر ټکوي او له مشرانو، دیني عالمانو او اسلامي امارت غواړي چې ددې ناوړه رواج مخه ونیسي.
هغه زیاتوي:« ولور باید کنټرول شي، اوس وخت کې څوک ددې توان نه لري چې په واده لکونو افغانۍ مصرف کړي»
په همدې حال کې یو شمېر دیني عالمان د قومي مشرانو له دغه پرېکړې هرکلی کوي او وايي، د ټولنې د هر وګړي دا مسوولیت دی چې د ناسمو رواجونو په له منځه وړلو کې مرسته وکړي.
نوموړی ددې پرېکړې عملي کول اړین بولي:« دوی چې کومه پرېکړه کړې د فعلي شرایطو په نظر کې نیولو سره د منطقې او د خلکو په خیر بولم. د ټولنې د هر وګړي او مسلمان ورور دا مسوولیت جوړیږي چې د ناسمو رواجونو په له منځه وړولو کې مرسته وکړي د مشرانو پرېکړه عمل کول ضروري دي.»
دوی زیاتوي د پخوانیو تړونونو د نه عملي کېدو یو علت دا و چې له تړون څخه د سرغړونې پر مهال هیچا ته سزا نه ورکول کېده او یا نه جریمه کیدل.
د پکتیا اوسېدونکي وایي، د تړون د نه عملي کېدو په صورت کې سزا تعیین شي او خلک جریمه شي.
د پکتیا اوسیدونکی احمدشا وایي، دغه سزا دې د اسلامي امارت د چارواکو او امنیتي بنسټونو په مرسته تطبیق شي.
د افغانستان په ډېری سیمو کې د نجلۍ د کورنۍ لخوا نه یوازې لوړ ولور اخیستل کیږي بلکې په واده کې لوړ لګښتونه د زوم او د زوم د کورنۍ ملا ماتوي چې دا وضعیت د هلک او نجلۍ راتلونکی ګډ ژوند له ستونزو سره مخ کوي.
هڅه مو وکړه چي په پکتیا کي د امارت نظر هم له ځان سره ولرو خو بریالي نه شوو.