پاکستاني پولیسو بوټ بازار کې د افغان کډوالو دوکانونه ویجاړ کړي
- 1 کال دمخه (24/10/2023)
- سمسور نیوز
- 640
په پاکستان کې د افغان کډوالو د ځورونو په دوام، دا ځل پولیسو د افغانانو دوکانونه ویجاړ کړي دي.
د پاکستان د اېکسپرېس ټرېبون ورځپاڼې د راپور له مخې، د پېښور په بوټ بازار کې شااوخوا ۴۰۰ دوکانونه، چې کلونه وړاندې د افغانانو له خوا جوړ شوي وو، د خیبر پښتونخوا ایالتي حکومت له خوا ویجاړ شوي دي.
د پېښور بوټ دغه بازار د کوچني کابل په نوم هم یادېده، ځکه ګڼ کاروباریان یې افغانان وو.
د سرچينې د معلوماتو له مخې، دغه عمليات په ټول پېښور کې دوام لري او د ناقانونه مارکېټونو د جوړولو په پلمه يې د افغان کډوالو د فعاليت مخه نيولې ده.
د دې رسنۍ د معلوماتو له مخې، د دغو عملياتو پر مهال تر سلو ډېر افغان کډوال هم نيول شوي دي، چې د دغه کار مخالفت یې کاوه.
دا په داسې حال کې ده، چې د پاکستان د موقت حکومت له خوا د ناقانونه افغان کډوالو د اېستلو لپاره ټاکل شوي ضرب الاجل ته یوازې یوه اوونۍ پاتې ده.