تېره میاشت افغانستان کې د تنفسي ناروغیو له کبله ۳۸۳ کسان مړه شوي
- 10 مياشتي دمخه (05/02/2024)
- سمسور نیوز
- 391
د روغتیا نړیوال سازمان ویلي، چې په افغانستان کې د تېرې یوې میاشتې په موده کې شدیدې تنفسي ناروغۍ زیاتې شوې دي.
یاد سازمان پرون ناوخته په یوه راپور کې ویلي، چې یوازې د دې میاشتې په دوو اونیو کې د تنفسي ناروغۍ نږدې ۸۴ زره پېښې ثبت شوې دي.
په راپور کې راغلي، چې د روان میلادي کال د جنورۍ له لومړۍ نېټې څخه تر ۲۷مې نېټې پورې په افغانستان کې د شدیدې تنفسي ناروغیو ۱۶۰ زره ۷۵۶ پېښې ثبت شوې، چې له کبله یې په ۳۴ ولایتونو کې ۳۸۳ کسان مړه شوي دي.
د یاد سازمان د معلوماتو له مخې، په دغو ناروغانو کې ۶۲،۹ فیصده یې له پنځو کلونو کم عمره ماشومان دي او په ټوله کې ۴۹،۳ فیصده ناروغان ښځې او نجونې دي.
د روغتیا نړیوال سازمان همداشان ویلي، سږ کال په ټول افغانستان کې ۲زره ۷۹۸ کسان د شدیدو تنفسي ناروغیو له امله مړه شوي دي.